ياااااااااااااااااه، مكنتش اعرف ان الفيلم هيتمكن من اعصابي لهذه الدرجة الفيلم ده حوالي خمس مرات احاول اتفرج عليه، وفي كل مرة بعد اول مشهدين اقفله الفيلم ما قبل الأخير لمخرجي المفضل من وانا عندي 8 سنين عارفه سينماه كويس، وعارفه بتخليني احس بإيه بس المرة دي يختلف، لإني بكبر وبالتالي المشاعر بتتغير، مفروض يعني بتدور احداث الفيلم عن أخ واخت بيتجمعوا بعد سنين طويلة، بس الاتنين معتلين عاطفياً وبنشوف ده ونتيجته عليهم وعلى اقرب الناس لهم الفيلم فكرني بأحلك لحظات حياتي لما طلبت نصيحة من صديق غبي، ونصحني باغبي نصيحة ممكن حد يقولها طالما مش عارفة تعملي ايه في حياتك دلوقتي، اشغلي نفسك بأي حاجة، اتجوزي ، اشتغلي اي حاجة تانية وقتها وصلت لقناعة، لما تيجي تطلب نصيحة من حد، شوف هو دلوقتي في حياته وصل لأي نقطة لان درجة التعاطف والتفاهم بتختلف، والافضل متطلبش نصيحة خالص لان لعلاج المشكلة، لابد من الاعتراف بوجودها اولا وهو ده اللي بطلين الفيلم مش قادرين يوصلوله الاتنين بيستميتوا على الحب، الرجل  قام بدوره "كازافيتس" مفهوم الحب عنده انه لازم يكون محوط نفسه بالنساء، وبالنسبة له هم لغز- فكرني بفرانسوا تروفو، كان في كل افلامه اللي فيها بطلات، بيحاول يلاقي اجابة عن سؤال " ايه سر المرأة"- والبطل مش قادر يقعد مع حاله ومش قادر يعترف بمسئوليته تجاه ابنه، اللي من خلال مشاهده معه ، نقدر نشوف ايه المستقبل اللي في انتظار الطفل ده اما الاخت قامت بدورها الجبارة وشريكة عمره وحياته الفنية ومصدر القوة في افلامه " جينا رولاندز"، الحب عندها معناه التعلق المرضي بعائلتها، وعدم اعترافها انها معتلة نفسياً الحل عند الاتنين مش انهم يلاقوا مسارات تانية للحب في حياتهم، على اد ما المفروض يعترفوا بوجود مشكلة في حياتهم، ويحبوا نفسهم، ساعتها هيعرفوا ايه الخطوة التالية اللي مفروض يتخذوها كازافيتس بيهتم بحكاية الشخصيات اكتر من الاسلوب الشكلي، هو بيطوع ادوات زي الارتجال، التصوير المتواصل بدون قطع، واستخدام الزووم للتركيز على الممثل في لقطات رد الفعل، او للتركيز لحوار مهم للشخصية والاهم انه مفيش نهاية سعيدة ، وهيعيشوا في تبات ونبات، هو مش بيضحك علينا فيه اغنية جميلة لساندرا كريتو، اسمها i need love المقاطع الاولى منها، هي ملخص لحالة الشخصيتين دول i need i need love i don't want to be alone tonight don't want to see the morning light the only thing i need is love