ميديا لمن لا يعرف من تكون ميديا في الاساطير الاغريقية، الست دي كانت بنت ملك وساحرة وعرافة وحاجات كتير، جاء لهم في يوم مطلعتلهوش شمس واحد اسمه جايسون عشان يسرق من عندهم الفروة الذهبية المهم ضحك عليها ووقعت في حبه زي الجردل، راحت سرقتله الفروة الذهب وهربت معه وعشان تلهي ابوها وميعرفش يلحق بهم في السكة، راحت قتلت اخوها وقطعت جثته حتت حتت ورمته على طول الطريق عشان ابوها يلم اشلاء ابنه وميعرفش يوصلها ولما وصلت مع جايسون للمملكة اللي سرقها منه عمه، سحرت بناته وسلطتهم على ابوهم ودبحوه وعاشت مع جايسون وخلفم ولدين، ومبقاش حد عايزها هي وجوزها في اي مكان، ففروا لمملكة تانية وهناك جايسون عينيه زاغت على بنت الملك وقرر يتجوزها عشان مصلحته، فالملك ابو العروسة خاف من ميديا وقرر ينفيها هي واولادها ميديا قررت ان تنتقم، راحت جابت فستان والقت عليه لعنة وبعتته مع اولادها هدية للعروسة، عشان لما تلبسه هيلزق على جسمها وهيحرقها ويحرق اي حد يقرب منها طبعا ميديا لم تكتف بهذا القدر من الحقد والغل وقررت تقتل اولادها، عشان تبقى نهت على حياة جايسون المستقبلية وعلى نسله هي دي حكاية ميديا، وملخص المسرحية اداء رائع من الراحلة هيلين ماكروري، ساعة ونصف مدة المسرحية بدون فواصل اداء رائع الصراع بين نفسها الحقودة وبين امومتها كان يفوق الوصف تصميم المسرح متقسم افقي، جزء علوي فيه احداث الزفاف وجزء سفلي فيه ميديا واولادها وجزء من الغابة التصميم عصري لان الاحداث في الوقت الحاضر ولكن المكان مهترئ بيعكس الحالة النفسية لميديا بالضبط فيه عناصر من التراجيديا الاغريقية، الجوقة المصاحبة وبتحكي الاحداث وبتحذر البطل والجمهور، دول موجودين ، الاضاءة درامية وجميلة جدا، وفيه اضافة لرقص حديث، الجريمة اتنفذت خارج المسرح ودي حاجة من تقاليد المسرح الاغريقي، الجمهور لا يرى الجريمة ولنا ان نتخيل مدى بشاعتها ميديا رغم انها مغضوب عليها في الاساطير، الا انها موجودة حوالينا في كل مكان الاباء اللي بتموت ابنائها انتقاما من ازواجهم، هم دول كلهم ميديا